Askur á Mógilsá undir Esjuhlíðum, gróðursettur 1967 af Haraldi krónprins í Noregi og seinna konungi, var nýverið formlega útnefndur Tré ársins. Þetta var gert við athöfn þann 24. september á vegum Skógræktarfélags Íslands (SÍ) sem haldin var á Mógilsá. Fulltrúi norska sendiráðsins á Íslandi afhjúpaði af þessu tilefni skilti um tréð sem síðan var mælt eftir kúnstarinnar reglum. Það reyndist vera 15,10 metrar á hæð og 31 metra breitt. Svo ber líka að halda því til haga að askurinn er sjálft tré guðanna í norrænni goðafræði, að því er frá greinir í Heimskringlu.
Öðrum þræði var askurinn á Mógilsá valinn nú sem Tré ársins til að heiðra minningu Haraldar konungs sem lést nýverið. Einnig til að minna á framlag Norðmanna til skógræktar á Íslandi, en bygging húss rannsóknarstöðvarinnar á sínum tíma var þjóðgjöf vinarþjóðar til Íslendinga. Félagsleg tengsl milli skógræktarfólks í þessum tveimur nágrannalöndum hafa sömuleiðis alltaf verið sterk, rétt eins og kom fram í ávörpum sem flutt voru á hátíðlegri stundu í gær.
Mynd þessi var tekin á Mógilsá 24. september og á henni eru frá vinstri talið Marianne Kvan, fulltrúi norska sendiráðsins á Íslandi, og Sara Hafbergsdóttir, fulltrúi garðyrkjustöðvarinnar Lambhaga, sem var bakhjarl þessa viðburðar. Næst kemur svo Sverrir Bollason, nýr formaður SÍ, og að baki honum er stofn hins sögulega trés. Lengst til hægri er svo Brynjólfur Jónsson framkvæmdastjóri SÍ.
Löng hefð er fyrir því að Tré ársins sé útnefnt og þau má finna víða um land. Margt ræður vali en hver seigla trjáa hefur verið við harðgerðar aðstæður er þar sterkur áhrifaþáttur.